Елордада өңірлерден келген 100-ден астам жас спортшының басын қосқан «Динара Сәдуақасованың шахмат кубогы – 2026» республикалық турнирі өтті. Турнир швейцариялық жүйе бойынша FIDE халықаралық рейтингін есептей отырып ұйымдастырылды. Ал жарыстың жалпы жүлде қоры 1 000 000 теңгені құрады. Бұл туралы Sportinfo.kz ақпарат агенттігі Қазақстан шахмат федерациясы баспасөз қызметіне сілтеме жасап хабарлайды.
Жүлде қорын халықаралық гроссмейстер, Қазақстан Республикасының еңбек сіңірген спорт шебері Динара Сәдуақасова өз қаражатынан бөлді. Ол көптеген жылдар бойы балалар шахматының дамуына белсенді қолдау көрсетіп, білім беру жобаларын жүзеге асырып келеді және бүкіл ел бойынша дарынды балаларға мүмкіндіктер жасау үшін өз қаражатын салуда.
Жарыстың бас төрешісі халықаралық төреші әрі ФИДЕ-нің халықаралық ұйымдастырушысы Айнұр Өтешева болды.
Турнирдің басты жүлдесі – шахматтан Динара Сәдуақасова кубогы мен 140 000 теңге көлеміндегі ақшалай сыйлыққа Жауынбай Әлімжан ие болды.
Ұйымдастырушылардың айтуынша, турнирдің негізгі мақсаты – жас шахматшылар үшін сапалы бәсекелестік орта қалыптастыру, зияткерлік спортты насихаттау және Қазақстанның дарынды спортшыларының жаңа буынын қолдау.
Динара Сәдуақасова – Қазақстанның ең танымал шахматшыларының бірі, халықаралық гроссмейстер, Қазақстан Республикасының еңбек сіңірген спорт шебері. Ол бірнеше дүркін Қазақстан чемпионы, халықаралық турнирлердің жеңімпазы және жүлдегері, сондай-ақ дүниежүзілік шахмат олимпиадаларының қатысушысы. Спорттық мансабымен қатар, Динара Сәдуақасова балалар спортын, білім беруді және шахмат мәдениетін дамытуға бағытталған қоғамдық жобаларды жүзеге асырып, белсенді қоғамдық қызмет атқарып келеді.
Ұйымдастырушылардың айтуынша, мұндай турнирлерді өткізу балалардың спорттағы жетістіктерімен қатар, өмірде де аса маңызды стратегиялық ойлау, тәртіп, жауапкершілік және шешім қабылдау дағдыларын дамытуға ықпал етеді.
Турнир жеңімпаздары мен жүлдегерлері кубоктармен, медальдармен, дипломдармен және ақшалай сыйлықтармен марапатталды.
TELEGRAM
По сообщению сайта SportInfo