Стоковые изображения от Depositphotos
Абай облысында Халықаралық «Айбын» әскери-патриоттық жастар жиынының облыстық кезеңі өтті. Дәстүрлі сайыс Шүлбі кентіндегі «Ұлан» патриоттық орталығының базасында ұйымдастырылды, деп хабарлайды Aranpress.kz тілшісі Абай өңірлік гарнизонының баспасөз қызметіне сілтеме жасап.
Жылдамдық пен ептілік, төзім мен күш сынға түскен іріктеу турына 10 әскери-патриоттық клуб қатысты. Олар аудандық және қалалық сайыстарда үздік нәтижеге қол жеткізген командалар. Жасөспірімдер алғашқы әскери дайындық негіздері бойынша сынға түсті. Бұл балаларды отансүйгіштікке тәрбиелеп, жігерлендіреді және салауатты өмір салтын насихаттап, жастарды спортпен шұғылдануға тартуда алар орны ерекше дейді ұйымдастырушылар. Бұған қоса сайыс Халықаралық «Айбын» әскери-патриоттық жастар жиынына қатысуға мықты командалар мен спортшыларды анықтау мақсатын көздеп отыр.
Турнир бағдарламасы бойынша оқушылар клубтары туралы бейнероликтер көрсетіп, «Айбын жұлдызы» шығармашылық байқауы мен «Smart Sarbaz» робототехника байқауында бақ сынады. Ал әскери-қолданбалы спорт түрлері бойынша, белтемірге тартылу, арқаға жатып денені көтеру, пневматикалық мылтықтан ату, АК-74 автоматын бөлшектеу және жинақтау, әскерилендірілген эстафета, арқан тартысу және 3 мың мен 1 мың метрге жүгіруде бақтарын сынады.
Жеңімпаздар мен жүлдегер командалар дипломдармен және кубоктармен марапатталады. Байқауының жеңімпаздары Алматы қаласында өтетін Халықаралық «Айбын» әскери патриоттық жарысына қатысатын болады. Жалпы соңғы кезде аймақ жастары өздерінің әскери бағытта жақсы өнерлерін көрсетіп келеді. Бұған дейінде жарыстың республикалық кезеңінде өңірдің оқушылары құр алақан қайтпаған. Жекелей номинациялар бойынша марапатталып, жоғарғы нәтижеге қол жеткізген.
Сурет: Абай өңірлік гарнизонының баспасөз қызметі
По сообщению сайта Arna Press