Қазақстан құрамасы семсерлесуден Азия чемпионатын соңғы жылдардағы ең үздік нәтижелерінің бірімен аяқтап, бес сайыс түрінен екі алтын және үш қола медаль жеңіп алды. Бұл туралы Sportinfo.kz ақпарат агенттігі Қазақстан семсерлесу федерациясының баспасөз қызметіне сілтеме жасап хабарлайды.
Турнирдің басты қорытындысы тек бес жүлдемен шектелмейді. Қазақстан құрамасы тарихта алғаш рет ерлер және әйелдер арасындағы жалпыкомандалық есепте бірдей үшінші орынға ие болды. Бұл көрсеткіш бойынша қазақстандық спортшылар тек Жапония мен Корея Республикасына жол берді.
Ең маңызды жетістіктердің бірі – Қазақстан құрамасының екі қару бойынша бірден бес сайыс түрінде жүлдеге қол жеткізуі. Бұған дейін ұлттық құраманың негізгі табыстары көбіне ерлер шпагасымен байланысты болса, бұл жолы әйелдер шпагасы мен ерлер қылышы да жоғары нәтиже көрсетті. Бұл қазақстандық семсерлесудің барлық бағытта жүйелі түрде дамып келе жатқанын айқын дәлелдейді.
Қазақстан құрамасының медальдық көрсеткіші
Ирина Бакалдинаның тарихи жеңісі Қазақстан әйел шпагашылары үшін Азия чемпионаттары тарихындағы алғашқы жеке алтын медаль болды. Әйелдер арасындағы командалық шпагадағы қола жүлде соңғы он жылдағы ең үздік нәтиже саналады.
Руслан Курбанов Азия чемпионаттарындағы мансабындағы үшінші жеке медалін жеңіп алды. Ерлер арасындағы шпагашылар құрамасы құрлық чемпионы атағын Қазақстанға қайта әкелсе, ерлер қылыш құрамасы тағы бір мәрте Азия чемпионатының жүлдегерлері қатарына енді.
Тарихи нәтиже
Қазақстан Республикасының семсерлесу бойынша мемлекеттік жаттықтырушысы Тимур Байтасов бұл жетістіктің тарихи маңызын ерекше атап өтті.
«Қазақстан тарихында алғаш рет ерлер мен әйелдер құрамалары Азияның ең үздік үш командасының қатарына қатар енді. Жалпыкомандалық есеп медальдардың сапасына қарай анықталды. Екі алтын жүлденің арқасында біз Қытай мен Гонконг құрамаларын артта қалдырдық. Тұңғыш рет ерлер және әйелдер құрамалары бір мезетте жалпыкомандалық есепте жүлдегер атанды. Бұл қазақстандық семсерлесу жүйесінің даму деңгейін көрсететін маңызды көрсеткіш», – деді Тимур Байтасов.
Жүйелі жұмыстың нәтижесі
Қазақстан семсерлесуінің бүгінгі жетістіктері Қазақстан Республикасы Туризм және спорт министрлігі мен Қазақстан семсерлесу федерациясының ұзақ жылдар бойы жүргізген бірлескен әрі жүйелі жұмысының нәтижесі болды.
Осы уақыт ішінде басты назар әлемдік деңгейдегі мамандарды тартуға, халықаралық ынтымақтастықты кеңейтуге, жас спортшыларды қолдауға және бірнеше олимпиадалық циклге арналған мықты резерв қалыптастыруға аударылды.
Қазіргі таңда ерлер мен әйелдер шпагасы әлемдік семсерлесудегі ең беделді мамандардың бірі саналатын жаттықтырушы-кеңесші Александр Горбачуктың жетекшілігімен дайындалады.
Биылдан бастап рапира бағытының дамуына Олимпиада чемпионы Артур Ахматхузин жетекшілік ете бастады. Ал ерлер қылышының жаңа даму кезеңі француз жаттықтырушы-кеңесшісі Арно Шнайдердің шақырылуымен байланысты.
Жаңа дайындық бағдарламасы аясында қазақстандық қылышшылар Францияда жаттығып, Еуропадағы ең мықты семсерлесу мектептерінің бірінің тәжірибесін меңгеріп жатыр.
Ұлттық құраманың бас жаттықтырушысы Алексей Писцов бұл жұмыстың ұзақ мерзімді мақсаттарға бағытталғанын атап өтті.
«Біз әлемдік деңгейдегі мамандарды бір ғана турнир үшін шақырып отырған жоқпыз. Бұл – болашаққа арналған инвестиция. Алдымызда әлем чемпионаты, Азия ойындары және жаңа олимпиадалық цикл тұр. Біздің мақсатымыз – қол жеткізілген прогресті сақтап қана қоймай, ұлттық құраманың дамуын одан әрі жалғастыру», – деді Алексей Писцов.
Федерация стратегиясының нәтижесі
Қазақстан семсерлесу федерациясының президенті Мирбулат Абуов бүгінгі нәтиже Федерацияның ұзақ мерзімді даму стратегиясының тиімділігін дәлелдейтінін айтты.
«Федерацияның даму стратегиясын айқындаған кезде мықты құраманы бір маусымда қалыптастыру мүмкін емес екенін жақсы түсіндік. Он жылға жуық уақыт бойы мемлекетпен бірлесіп жаттықтырушылық әлеуетті күшейтіп келеміз, жас спортшылардың дамуына тұрақты инвестиция салып, үздік халықаралық мамандарды тартып, бірнеше олимпиадалық циклге бағытталған жүйелі жұмыс жүргізіп жатырмыз. Бүгін біз осы стратегияның нақты нәтижесін көріп отырмыз. Әсіресе жетістіктің бірнеше сайыс түрінде қатар келуі өте маңызды. Мұндай нәтижелер Қазақстан үшін тұрақты көрсеткішке айналуы үшін бұл жұмысты жалғастыра береміз», – деді Мирбулат Абуов.
Азия чемпионатының қорытындысы бойынша Қазақстан құрамасы бес медаль жеңіп алып, тарихта алғаш рет ерлер мен әйелдер арасындағы Азияның үздік үш құрамасының қатарына енді. Сонымен қатар бұл нәтиже қазақстандық семсерлесудің бірнеше бағыт бойынша табысты дамып келе жатқанын тағы бір мәрте дәлелдеді.
Ұлттық құраманы алда әлем чемпионаты мен Азия ойындары күтіп тұр.
По сообщению сайта SportInfo