Стоковые изображения от Depositphotos
Абай облысының Үржар әуежайы туризмді дамыту мақсатында қайта жаңғыртылуда, деп хабарлайды Arnapress.kz тілшісі облыстық әкімшіліктің баспасөз қызметіне сілтеме жасап.
Әуежайдың ұшып-қону жолағы 1500-ден 2100 метрге, ені 35 метрге дейін ұлғайтылды. Бұл Fokker, Bombardier, Embraer және басқа да осыған ұқсас топтардың ұшақтарын қабылдауға мүмкіндік береді. Ұзындығы 175 м, ені 16 м болатын 2 рульдеу жолының құрылысы жүргізілді.
2 әуе кемесі тұрақтайтын перрон бір уақытта 2 ұшақты қабылдауға мүмкіндік береді және 5 қабатты бақылау мұнарасы жаңадан салынды.
Әуежайда әуе кемелерін тәулік бойы қабылдау үшін ұшу-қону жолағында жарықтандыру қондырғылары мен бейнебақылау орнату жұмыстары жүргізілуде. Бүгінгі таңда Алматы – Семей – Үржар бағыты бойынша рейстер қабылдануда.
Сонымен қатар, әуежай терминалының ғимаратын қайта жаңғыртудың жобалық-сметалық құжаттары әзірленуде. Бұл ретте Нұржан Тоқсеитов биыл Үржар ауданында сағатына 100-150 жолаушыны қабылдай алатын жаңа әуежай ғимаратының құрылысы басталатынын атап өтті.
«Қазір терминал сағатына 30-ға жуық адамды қабылдайтын болса, құрылыс аяқталғаннан кейін бұл көрсеткіш айтарлықтай артады. Мысал ретінде, Семей немесе Өскемен әуежайларын келтіруге болады», — деді Нұржан Тоқсеитов.
Сурет: qazweek.kz, Абай облысы әкімшілігінің баспасөз қызметі
По сообщению сайта Arna Press