Қазақстандық шахматшы Алуа Нұрман 2026 жылғы рапид және блиц бойынша командалық әлем чемпионатындағы басты кейіпкерлердің біріне айналды. Оның ойынының арқасында Barys командасы рапид турнирінде медальға соңғы сәтке дейін үміткер болды. Бұл туралы Sportinfo.kz ақпарат агенттігі Қазақстан шахмат федерациясының баспасөз қызметіне сілтеме жасап хабарлайды.
19 жастағы алматылық шахматшы әуелі Магнус Карлсеннің командасын жеңуге үлес қосып, 12-ші әлем чемпионы (2008–2010), рапид бойынша әлем чемпионы (2021) және вице-чемпионы (2012, 2014, 2016) Александра Костенюкті жеңді. Одан кейін Алуа қолданыстағы әлем чемпионы Цзюй Вэньцзюньмен (Dragon Chilling) тең түсті. Келесі екі матчта ол тағы да жеңіске жетті: алдымен өзбекстандық құраманың көшбасшыларының бірі Гүлрұхбегім Тоқыржонованы (Sky Chess), сосын 2025 жылғы Әлем кубогының жеңімпазы, Претенденттер турнирінің қатысушысы Дивья Дешмұхты (Hexamind Chess Team) жеңді. Рапид турнирін Алуа әлемнің ең титулды шахматшыларының бірі Харика Дронаваллимен (Team MGD1) тең нәтижемен аяқтады.
Қорытындыда Barys командасы 9-орынға тұрақтаса, Алуа Нұрманның өзі әйелдер тақтасында күміс медаль жеңіп алды.
Блиц турнирінде Алуаның жетістіктері қатарында 2025 жылғы Еуропа чемпионы Теодора Иньяцті (Theme International Trading) жеңуі және 2018 жылғы блиц бойынша әлем чемпионатының қола жүлдегері Лэй Тинцземен (Dragon Chilling) 1½–½ есебімен микроматчта жеңіске жетуі бар.
Қазақстан шахмат федерациясы және оның бас демеушісі Freedom Holding Corp. Гонконгта екі командамен — Kazchess және Barys ұсынылды.
Kazchess құрамында: Бибісара Асаубаева, Қазыбек Нөгербек, Алдияр Ансат, Меруерт Камалиденова және әуесқой Кұмар Түлепұлы. Сондай-ақ команда үшін шетелдік гроссмейстерлер ойнады: Шахрияр Мамедьяров, Александр Грищук, Рихард Раппорт және Ван Хао. Команда капитаны — ҚШФ бірінші вице-президенті Дармен Садвакасов. Кұмар Түлепұлы рапидте әуесқойлар тақтасында қола жүлде алды.
Barys құрамында: Дмитрий Андрейкин, Пётр Свидлер, Денис Махнев, Рамазан Жалмаханов, Даниял Сапенов, Ерғали Сүлеймен, Ксения Балабаева, Алуа Нұрман және әуесқой Айлин Зарқым. Команда капитаны — ҚШФ атқарушы директоры Гүлмира Дәулетова.
По сообщению сайта SportInfo