Бүгін сағат 08:10-да Семей-Павлодар тасжолы мен Қарағайлы ықшамауданының қиылысында мопед пен автокөліктің қатысуымен жол-көлік оқиғасы орын алды, — деп хабарлайды Arnapress.kz тілшісі облыстық ПД баспасөз қызметіне сілтеме жасап.
Алдын ала мәліметтер бойынша, 17 жастағы жүргізуші басқарған мопед алдында қозғалып бара жатқан «ВАЗ-2115» маркалы автокөлікке соқтығысқан. Қақтығыстың нәтижесінде мопед өртеніп кетті.
Мопедтің жүргізушісі ауруханаға жеткізілді. Автокөлік жүргізушісі зардап шеккен жоқ.
Оқиға орнында полиция қызметкерлері жұмыс істеді. Жол-көлік оқиғасының мән-жайы анықталуда. Апат бойынша тексеру жұмыстары жүргізілуде, — деді баспасөз қызметінде.
Біздің редакцияға белгілі болғандай, оқиға орнында бағдаршам жұмыс істеген жоқ. Мопед жүргізушісі мен жолаушы медициналық тексерістен кейін, орташа және жеңіл жарақаттармен үйлеріне жіберілді.
Сурет: Абай облысы ПД баспасөз қызметі
По сообщению сайта Arna Press