Шымкент қаласының тұрғыны пәтер аламын деп, ақшасынан айырылды
Шымкенттік тұрғын мемлекеттік бағдарламамен үй аламын деп 7 млн теңгеге жуық қаржысынан айырылды, — деп хабарлайды Arnapress.kz тілшісі сайтына Tengrinews.kz сілтеме жасап.
Биыл 22 қаңтарда, сағат 13:58-де Әл-Фараби АПБ-ға жергілікті жердің тұрғыны арызданған. Ол өз арызында, бір айдан бергі танысы Шымкент қаласынан мемлекеттік бағдарлама бойынша екі ай уақыттың ішінде пәтер алып беремін деп 6 миллион 650 мың теңге ақшасын алдын ала алаяқтық жолмен иемденіп алғанын жазып көрсеткен.
Аталған дерек ҚР ҚК-тің 190-бабы 1-бөлігімен (Алаяқтық) сотқа дейінгі тергеп-тексерулердің бірыңғай тізіліміне тіркелді.
Полиция қызметкерлері күдіктінің жеке басын анықтау мақсатында барлық қажетті шараларды қабылдап, жедел-іздестіру жұмыстарын жүргізді. Нәтижесінде тәртіп сақшылары күдікті азаматшаны қала аумағынан қолға түсірді.
Ол Шымкент қаласының 63 жастағы тұрғыны болып шықты. Зейнеткер. Бұған дейін мұнай саласында жұмыс жасаған. Сондай-ақ ұсталған азаматша бұрын алаяқтық жасағаны үшін жауапкершілікке тартылып, істі болған.
Қазіргі уақытта күдікті уақытша ұстау изоляторында қамауға алынды. Тергеу амалдары жүргізіліп жатыр.
Сурет:Tengrinews.kz
По сообщению сайта Arna Press